Pregunta (FAQ)

Preguntanan ku ta keda hasí ku regularidat i nan kontesta.

1Kuantu tempu i kon e konsulta di eko ta tuma lugá ?

E konsulta ta dura mas o menos 30 t/k 45 minüt i ta tuma lugá den un ambiente relahá i den un espasio trankil. Bo por sigui e proyekshon di e imagennan riba un pantaya, miéntras ku e ekoskopista ta move e “transducer” riba e barika.  E ekoskopista ta duna splikashon amplio durante di e sehon di eko.  Si e futuro mayornan ta deseá, e ekoskopista lo por wak e sekso i por midi e largura di e yuchi.

Ta e intenshon pa optené imagennan mas kla posibel riba e pantaya i traha un eksposishon fotográfiko bunita di  e yuchi. Esaki ta duna un balor agregá na fortifikashon di e union speshal entre mayor i yu durante e embaraso.

Durante e eko ta produsí for di e imagennan mas bunita un kantidat di portrèt (di koló), ku ta keda entregá na e mayornan. Tambe nos por pone e imagennan riba CD pa’bo i henter e proseso di eko riba un DVD.  Durante di e seshon, nos ekoskopista ta habrí pa tur pregunta i lo trata pa duna mas tantu informashon posibel.

2. Ekoskopi ta kousa daño ?

Durante hopi aña tin  estudio sientífiko ta tuma lugá pa haña sa si ekoskopi tin konsekuenshanan dañiño. Te ku awe no a keda konstatá ku ekoskopi di un òf otro manera ta kousa daño.

3. For di ki momento por laga hasi un eko ?

“BabyView” ta hasi eko di 2-D for di 12 siman di embaraso. Sinembargo  mayoria eko di 2-D ta keda hasi entre 16 pa 24 siman di embaraso.

4. Kua ta e momento adekuá pa un eko di 3-D ?

E momentu adekuá pa hasi un eko di 3-D ta entre 26 pa 32 siman di embaraso. Na e momentu ei e bebi a haña mas  tehido di moda ku e kara tin mas ekspreshon.  Por hasi eko di 3-D te ku 33 siman. Esaki ta dependé di e posishon di e plasenta i e kantidat di awa di parimentu.

5. Un eko di 3-D ta logra semper ?

Un eko di 3-D no ta logra semper. Nos ta disponé di e mihó aparato riba tereno di ekografia, pero e bon resultado di e eko ta dependé totalmente di e manera ku e yuchi ta drumí e momentu ei, i di e kantidat di awa di parimentu. Tambe e tekstura diki di kueru i e kapa di gordura bou di e kuero  ta hunga un ròl  importante.  Pa damanan mas yen e resultado lo por sali menos satisfaktorio.

Tèknikamente mirá, semper lo por produsí portrèt di e imagennan di e yuchi, pero nos lo kier mira  i kapta mas  bien e kara i si e yuchi ta drumí den un posishon bunita. Nos aparato ta brinda e posibilidat pa den un forma fásil i rápido, kapta imagen nobo konstantemente, di moda ku tin e oportunidat grandi di por haña un bon bista di e yuchi.

6. Aspektonan médiko ta haña atenshon ?

Enfátikamente mester keda menshoná ku “BabyView” ta hasi un asina yamá “pret-echo” i komo tal gustosamente kier laga mira imagennan bunita di e yu.  Tambe “BabyView” kier kontribuí na reforsá e laso speshal entre mayornan i e yu durante di e embaraso.

Sinembargo, hústamente pa motibu di e  ekspèrtisia di e ekoskopista, e ta wak di mes si tur kos ta na òrdu.  Den kaso ku e ekoskopista nota algu ku mester haña atenshon médiko, e ta tuma, den konsulta ku e mayornan, kontakto ku e profeshonal en kestión pa tratamento mas aleu.

7. For di ki momento por haña sa sekso di e bebi ?

“BabyView” ta hasi investigashon di sekso for di 17 siman di embaraso. Mas promé e imagennan no ta muchu kla tur ora. Solamente riba petishon di e mayornan ta hasi investigashon di sekso.

8. Por bini ku famia òf amigunan na e konsulta di eko ?

Ta bo mes ta disidí ku ken bo ta bini na e konsulta di eko. Un seshon di eko ta keda un asuntu pèrsonal i  íntimo . Pa e proseso di un konsulta por bai agradabel i sin molester, ta konsehabel pa no bini ku mas ku kuater pèrsona èkstra.  Si ta bini ku mucha, nos ta konsehá pa prepará nan bon riba e proseso di e seshon di eko, pa nan sa kiko nan ta bai mira mas o menos.

9. Ki ora i kon mester paga ?

Pago tin ku tuma lugá direktamente na fin di e konsulta. Ta akseptá solamente pago kontante.